يا ويل ويله !!

محمد القعايده · منذ /13-03-2010, 12:07 PM

بسم الله الرحمن الرحيم

الغاليين .. رواد

..

يتجدد اللقاء .. فاتمنى ان تنال على بعض الرضا

يا ويل ويله وويل اللي قضا ليله=يذرف دموعه على أحضان أحزانه
ما عاد في جعبته للحيل أيْ حيله=مهدوم مبطي .. وزاد الهجْر هدمانه
بايع يصون الهوا لو زاد تنكيله!!=وما باع وعده على من يرفع اثْمانه
الحبّ عاشه وعايش كلْ تفاصيله=لين الحبايب تبنّو وجْد نسيانه
والبعْد دور(ن) وهو ما جاد تمثيله=واكبر دليل الدعا ما فارق الْسانه
والصدْر ميدان اذا انّه ضاق من خيله!!=يبوح هالفارس اللي ضاق ميدانه
والحظّ عنده مثل ميله على ميله=والضحْك صوره لحزن(ن) صار عنوانه
راح البحر والعطش يرميه ويْشيله=واثر البحر شاطي(ن) وامْواج عطشانه!!
يطول ليله .. مشى كنّه على امْهيله!!=وما في سوات القمر يدري عن اشْجانه
وبْطلعة الضوّ هيجنها على ويله=ومع كلّ بيت(ن) قلع من شوك بستانه
بعد الفجر والفجر يقظي مواويله=ينام والدمْع يملى فيض وديانه

وسلامتكم ..

محمد القعايده بني حميده